अष्ट्रेलियामा शिक्षक अभाव हटाउन नयाँ योजना

0
677

अष्ट्रेलिया। अष्ट्रेलियामा पछिल्लो समयमा देखिएको शिक्षकको अभाव पूरा गर्न राष्ट्रिया कार्ययोजना ल्याइने भएको छ। केन्द्रीय सरकारका शिक्षामन्त्री तथा अन्य राज्य तथा टेरिटोरीका शिक्षामन्त्रीले समस्या समाधान गर्न राष्ट्रिय कार्य योजना ल्याउने सहमति जनाएका हुन्।

अष्ट्रेलियाका विभिन्न राज्य तथा टेरिटोरीका शिक्षामन्त्रीसँगको वार्तापछि केन्द्रीय शिक्षामन्त्री जेसन क्लेयर। तस्बिर : एजेन्सी केन्द्रीय शिक्षामन्त्री जेसन क्लेयरले ६ राज्य तथा २ टेरिटोरीका शिक्षामन्त्रीसँग अहिले देखिएको शिक्षक अभाव पूरा गर्न छलफल आयोजना गरेका छन्। छलफलमा शिक्षामन्त्रीहरूले शिक्षकको चरम अभाव रहेको र त्यसलाई पूरा गर्न यस वर्षको अन्यसम्ममा राष्ट्रिय कार्ययोजना ल्याउन सहमत भएका हुन्। शिक्षक अभावका कारण पछिल्लो समय दुर्गमका विद्यालयमा पढाइ नै रोक्नुपर्ने अवस्था सृजना भइसकेको स्थानीय सञ्चारमाध्यमहरूले जनाएका छन्। समस्या चर्किएपछि समाधानका उपाय खोज्न सबै शिक्षामन्त्री छलफलमा जुटेका हुन्। कार्ययोजनाअनुसार नयाँ र आकर्षक तलब तथा सेवा सुविधा, कामको कम भार, शिक्षण पेसामा नयाँलाई आकर्षित गर्नेलगायतका व्यवस्था गरिने भएको छ।

अष्ट्रेलियाली शिक्षण पेसामा काम गर्ने शिक्षकले सातामा ७० घण्टासम्म काम गर्नुपर्ने बाध्यता रहेको बताइएको छ। अबको ३ वर्षसम्ममा अष्ट्रेलियामा ४ हजारभन्दा बढी शिक्षकको अभाव हुन सक्ने आकलन छ। शिक्षामन्त्री क्लेयरले शिक्षण पेसा अत्यन्तै महत्त्वपूर्ण भए पनि आवश्यकता पूरा गर्ने शिक्षक नरहेको बताएका छन्। उनले राष्ट्रिय कार्ययोजना धेरै व्यक्तिलाई शिक्षण पेसामा आउन प्रेरित गर्ने, पेसामा रहेकाले स्थायी रूपमै रहने प्रोत्साहन गर्ने तथा शिक्षण पेसामा आउन चाहनेलाई कार्यक्षेत्रमा योग्य बन्नका लागि तयार गर्न केन्द्रित हुने बताएका छन्। उनले विद्यार्थी र कक्षाकोठाको संख्या बढिरहेको तर उक्त कक्षा सञ्चालन गर्ने शिक्षक भने कम रहेको भन्दै चिन्ता व्यक्त गरेका छन्।

शिक्षक अभाव चर्किएपछि न्यु साउथ वेल्स, भिक्टोरिया, दक्षिण अष्ट्रेलियालगायतका राज्यले हजारौं डलर बराबरको नगद सुविधा दिने घोषणा गरिसकेका छन्। भिक्टोरिया राज्यले त दुर्गम स्थानमा अध्यापन गराउन जानेका लागि थप सुविधासहित आउजाउका लागि सबै खर्च र सुविधासमेत सरकारले नै बेहोरिदिने घोषणा गरेको छ।

दक्षिण अष्ट्रेलियाको सरकारी विद्यालयमा एक दशकदेखि पढाइरहेका कपिल पाण्डेले शिक्षा तथा अध्यापन क्षेत्रमा रुचि भएका नेपालीलाई समेत शिक्षण पेसामा आउने राम्रो अवसर भएको बताए। उनले अहिले अत्यन्तै कम नेपालीले अष्ट्रेलियाका विद्यालयमा अध्यापन गराइरहेको बताउँदै आफ्नो योग्यता तथा ज्ञानअनुसार शिक्षण पेसा अपनाउन सकिने प्रशस्त सम्भावना रहेको सुनाए।