अष्ट्रेलियामा स्वास्थ्य सुरक्षा अपनाउँदै होली मनाउने तयारी

0
299

मेलबर्न। रंगहरुको चाड होलीले अहिले नेपाललाई मात्र नभई विदेशमा बस्ने नेपालीहरुलाई समेत उत्साहित बनाइरहेको छ। होली पर्व नेपालमा विशेषगरी तराईमा भव्यताका साथ मनाउने गरिन्छ। नेपालको तराई क्षेत्रमा स्थायी घर भई हाल अष्ट्रेलियाको भिक्टोरिया राज्यमा बसोवास गरिरहेका नेपालीहरुको साझा संस्था एमसीभी (मधेसी कम्युनिटी इन भिक्टोरिया)ले स्वास्थ्य सुरक्षा अपनाउँदै भव्यताका साथ होली मनाउने तयारी गरेको छ।

संस्थाले नेपाली कला, संस्कृतिको सम्बर्द्धन तथा प्रबर्द्धन गर्ने र संगै नयाँ पुस्तालाई नेपालीपन प्रदान गर्ने उद्देश्यले हरेक वर्ष यो विशेष चाड भव्यताका साथ मनाउंदै आएको छ। कोरोना महामारीका कारण गत वर्ष भने आफ्नो यो कार्यक्रमलाई निरन्तरता दिन नसकेको एमसीभीले यो वर्ष सरकारले तोकेको मापदण्डको पालना गर्दै उल्लासपूर्ण तवरले होली माउने तयारी गरेको हो।

मार्च २८ मा हुने होली विशेष कार्यक्रममा सहभागीलाई रंगहरु उपलब्ध गराइने आयोजकले बताएका छन्। त्यस्तै कार्यक्रम होलीसंगै बार्बीक्यु, डिजे म्युजिकको पनि मज्जा लिन सकिनेछ। जुनसुकै समुदायबाट पनि सहभागी हुन सकिने यस कार्यक्रममा सहभागिताको लागि नाम दर्ता गराउनु पर्नेछ। राज्य सरकारले तोकेको मापदण्ड अनुसार, सिमित मान्छेहरु मात्र राख्न सकिने हुनाले दर्ता प्रक्रिया समावेश गरिएको आयोजकले बताएका छन्। “Celebrate Friendship, Harmony and Goodwill” भन्ने नाराका साथ Coburg lake पार्कमा हुने यस कार्यक्रममा सहभागी हुनको लागि नाम दर्ता गर्न यो लिंक क्लिक गर्नुहोस् >> https://fb.me/e/y1LxIM3f