काठमाडौँ  । आगामी आर्थिक वर्षदेखि काठमाडौं उपत्यकामा प्लास्टिक झोला प्रयोगमा पुन: प्रतिबन्ध लाग्ने भएको छ । विज्ञान, प्रविधि तथा वातावरण मन्त्रालयले प्लास्टिक झोला प्रयोगमा प्रतिबन्ध लगाउन लागेको हो ।

उपत्यकामा १ वैशाखदेखि प्लास्टिकको झोला प्रयोगमा प्रतिबन्ध लगाइएकामा १२ वैशाखको भूकम्प र त्यसपछिका पराकम्पनका कारण मन्त्रालयले निरीक्षण गर्न सकेको थिएन । आगामी आवदेखि प्लास्टिकको झोला उत्पादक तथा प्रयोगकर्तामाथि कडाइका साथ अनुगमन गरी प्रयोगमा प्रतिबन्ध लगाइने मन्त्रालयका प्रवक्ता महेन्द्रकुमार थापाले जानकारी दिए । मन्त्रालयले अहिलेसम्म उपत्यकाका मुख्य बजार तथा प्लास्टिक उत्पादन गर्ने विभिन्न कम्पनीमा छापा मारी १४ क्विन्टल प्लास्टिक बरामद गरेको छ ।

मानव स्वास्थ्यमा हानि पुर्‍याउने विभिन्न किसिमका रसायनको मिश्रणबाट उत्पादन भएका प्लास्टिकको प्रयोगबाट उपत्यकाको वातावरणमा प्रतिकूल असर, नदीनाला फोहोर, ढल जाम तथा सहरको सौन्दर्यमा ह्रास आउँदै गएको छ । आगामी आवदेखि कालिमाटी तरकारी बजारलगायत ठूलो परिमाणमा प्लास्टिक खपत हुने अन्य व्यापारिक केन्द्रमा कडाइका साथ अनुगमन गरी प्रयोगलाई निरुत्साहित गरिने वातावरणविद् डा. जयराम अधिकारीले जानकारी दिए । उनका अनुसार उपत्यकाका प्रमुख ठूला पसलमा प्लास्टिकको झोलाको प्रयोगमा कमी आएको छ ।

Comments