काठमाडौँ । गैरआवासीय नेपाली संघको आगामी नेतृत्व चयनकालागि आज निर्वाचन हुँदैछ ।

संघको नयाँ नेतृत्वका लागि प्रत्येक दुई÷दुई वर्षमा निर्वाचन हुने गर्दछ। कूल ४२ पदका लागि आज दिउँसो ३ बजेदेखि साँझ ८ बजेसम्म हुने निर्वाचनमा विद्युतीय यन्त्रबाट मतदान हुनेछ।

निर्वाचनका लागि हिजो राति ९ बजेदेखि बुधबार बिहान १०ः३० बजेसम्म उम्मेद्वार मनोनयनको समय तोकिएको छ। निर्वाचनमा करीब २ हजार ४०० मतदाता सहभागी हुनेछन्।

नयाँ नेतृत्वका लागि वर्तमान उपाध्यक्षद्धय कुमार पन्त र कुल आचार्यबीच प्रतिस्पर्धा हुँदैछ।

संघको निर्वाचनमा सम्भवतः नेपालकै सबभन्दा बढी उम्मेद्वारी दर्ता शुल्क तोकिएको छ।
आज हुने निर्वाचनमा उम्मेद्वारी दर्ता शुल्क एक लाखदेखि १० लाख रुपैयाँसम्म तोकिएको संघका प्रमुख निर्वाचन आयुक्त शिव रिजालले जानकारी दिनुभयो ।

गत महाधिवेशनमा अध्यक्षको उम्मेदवारको दर्ता शुल्क सात लाख ५० हजार रुपैयाँ रहेको थियो। गत महाधिवेशनभन्दा यसवर्ष दुई लाख ५० हजार रुपैयाँ बढाएर १० लाख पुर्‍याइएको हो।

अध्यक्षको दर्ता शुल्क रु १० लाख तोकिएको छ भने अन्तर्राष्ट्रिय समन्वय समिति (आईसीसी सदस्य) को एक लाख रुपैयाँ तोकिएको छ। संघको भवन बनाउन र गोरखाको लाप्राक नमूना बस्ती बनाउन पैसा आवश्यक भएकाले उम्मेदवारको शुल्क बढाइएको बताइएको छ ।

निर्वाचन प्रमुख आयुक्त रिजालका अनुसार उपाध्यक्षको सात लाख, महासचिवको ६ लाख, सचिव र कोषाध्यक्षको पाँच लाख, सहकोषाध्यक्षको चार लाख, महिला तथा युवा संयोजकको तीन लाख ५० हजार, क्षेत्रीय संयोजकको तीन लाख ५० हजार, क्षेत्रीय उपसंयोजकको दुई लाख ५० हजार, क्षेत्रीय महिला तथा युवा संयोजकको दुई लाख ५० हजार र आईसीसी सदस्यहरुको एक लाख रुपैयाँ उम्मेदवार दर्ता शुल्क तोकिएको छ।

‘म, मेरो एनआरएन र मेरो नेपाल’ भन्ने मूल नाराका साथ शुरु भएको संघको नवौँ नेपाली विश्व सम्मेलन तथा अन्तर्राष्ट्रिय महाधिवेशनको हिजो राष्ट्रपति विद्यादेवी भण्डारीले उद्घाटन गर्नुभएको थियो । तीन दिनसम्म चल्ने सम्मेलनमा ८१ मुलुकका करीब दुई हजार ५०० प्रतिनिधि सहभागी छन्।

Comments