काठमाडौं । बैंक तथा वित्तिय संस्थाको प्रविधि दुरुपयोग गरी ५ अर्ब रुपैयाँ भन्दा धेरै रकम झिकेर विदेश लैजाने योजनामा संग्लन गिरोहलाई प्रहरीले सार्वजनिक गरेको छ ।

महानगरीय प्रहरी अपराध महाशाखाले आज पत्रकार सम्मेलनको आयोजना गरी १२ जनालाई सार्वजनिक गरेको हो । प्रहरीले उनीहरुको साथबाट ४० लाख ५० हजार रुपैयाँ समेत बरामद गरेको छ । पक्राउ पर्नेमा नुवाकोट मेघाङका लवाङ तामाङ, रसुवा नौकुण्डका लक्ष्मी लामा तामाङ, निर्मला तामाङ र निमा तामाङ र काठमाडौं काभ्रेस्थलीका संजय घले रहेका छन् । यस्तै सर्लाही हरिवनका पुष्पराज खड्का, लमजुङ दोर्दी गाउँपालिकाका विद्यासागर लामिछाने, तनहुँ भानु नगरपालिका वडा नम्बर ९ का श्रवणकुमार श्रेष्ठलाई पनि प्रहरीले सार्वजनिक गरेको छ । भारत कोलकत्ताका शुबन्कर पन्जा, कैलाली भजनी नगरपालिका वडा नम्बर ३ का विजय शाह र चन्द्रबहादुर बुढालाई पनि प्रहरीले पक्राउ गरेको छ ।

भारतको मुम्बईमा बस्ने काले भन्ने पिटरले नेपालीहरुलाई सम्पर्क गरी बैंक तथा वित्तिय संस्थाको रकम निकाल्ने काममा प्रयोग गरेको प्रहरीले जनाएको छ । पिटरले अवैध रुपमा बैंकको रकम झिक्ने काममा संग्लनहरुलाई मुम्बई नै बोलाएर काम सिकाएको र पैसा निकाले वापत कमिसन दिने गरी काममा लगाएको बुझिएको प्रहरीको भनाइ छ । रकम निकालेर भारत पठाउनेहरुलाई १५ देखि ३५ प्रतिशत कमिशन दिने गरी काममा लगाएको देखिएको प्रहरीले बताएको छ ।

ह्याकरको समुहले कृषि विकास बैंकको विभिन्न शाखाकाबाट ४ करोड ७३ लाख ९६ हजार रुपैयाँ अवैध रुपमा झिकिएको जनाएको छ । त्यस्तै नयाँ बानेश्वरमा रहेको पानस रेमिटबाट भने १२ लाख रुपैयाँ प्राविधिक छिद्रको फाईदा उठाई झिकिएको देखिएको प्रहरीले जनाएको छ ।

Please follow and like us:

Comments