काठमाडौं । फिफा विश्वकप २०२२ तथा एसियन कप २०२३ क्वालिफायरको पहिलो खेल नेपालले बिहीबार (आज) विपक्षी टोली कुवेतसँग खेल्दैछ ।

नेपाली टोलीले बिहीबार स्थानीय समय अनुसार १० बजेर ४५ मिनेटमा कुवेतविरुद्ध उसैको घरेलु मैदान जाबेर अल अहमद अन्तर्राष्ट्रिय रंगशालामा प्रतिस्पर्धा गर्दैछ ।

आइतबार कुवेत पुगेको नेपाली टोलीका लागि विश्वकप छनोटको शुरुवात बलियो टोलीसँग खेल्दै हुनेछ । फिफा बरियतामा कुवेत नेपालभन्दा १० स्थान माथि छ । तर, पनि नेपाली टोलीले कुवेतसँग ‘टफ’ खेल्ने नेपाली टोलीका कप्तान विराज महर्जन बताउँछन् ।

नियमित कप्तान महर्जन टोलीमा नहुँदा उपकप्तान किरण चेमजोङले विश्वकप छनोटमा टोलीको नेतृत्व गर्नेछन् । कप्तान महर्जनले नेपाली खेलाडीले गएको मार्चमा राम्रो प्रदर्शन गरेको उल्लेख गर्दै विश्वकप छनोटमा राम्रो खेल्ने बताएका छन् ।

‘कुवेत नेपालभन्दा बलियो टोली पक्कै हो । यसका खेलाडी हाम्रो भन्दा राम्रो अनुभवी छन् । तर, मार्चमा भएको मैत्रिपूर्ण खेलमा नेपाली टोलीले कुवेतविरुद्ध राम्रो खेलेको थियो । त्यस्तै खेल खेल्न सके नेपाल कुवेतविरुद्ध हावी हुन सक्छ,’ महर्जनले भने,‘पछिल्लो खेलहरुमा राम्रो प्रदर्शन गरेका खेलाडी नै अहिले टोलीमा छन् । आशा छ खेलाडीहरुले विश्वकप छनोटमा राम्रो खेल्नेछन् ।’

महर्जनले नेपालले राम्रो गर्ने बताएपनि कुवेतविरुद्धको नेपालको विगत भने सम्झनालायक छैन । अहिलेसम्म नेपालले कुवेतसँग ६ खेल खेलेको छ । जसमा नेपाल ५ खेलमा नेपाल पराजित हुँदा एक खेल बराबरी खेलेको छ ।

नेपाली टोलीका मुख्य प्रशिक्षक योहान कालिनले कुवेतविरुद्ध राम्रो खेल्ने प्रयास गर्ने बताएका छन् । ‘हामी सम्भव भएसम्म राम्रो खेल्ने प्रयास गर्ने छौं । हामीसँग यो भन्दा राम्रो अरु कुनै उपाय छैन,’ कालिनले भने,‘हामीले आफुसँग भएका संरचनामा अभ्यास गर्यो र खेलाडीले राम्रो मेहनत गरेका छन् । हामीलाई थाहा छ कुवेत बलियो टोली हो ।’

 

Comments