मेलबर्न । अष्ट्रेलियामा स्कट मरिसनले नेतृत्व गरेको लिबरल कोअलिसन सरकार अल्पमतमा परेको छ ।

शनिबार भएको उप निर्वाचनमा लिबरलका उम्मेदवारले हार ब्योहोरेपछि सरकार अल्पमतमा परेको हो । पूर्व प्रधानमन्त्री माल्कम टर्नबुलले राजनीतिबाट सन्यास लिएपछि सिड्नीस्थित उहाँको निर्वाचन क्षेत्र वेन्टवर्थमा उप निर्वाचन भएको थियो । उक्त निर्वाचनमा लिबरलका भारतीय मुलका देव शर्माका साथै स्वतन्त्र उम्मेदवार डा केरन फेल्प्स र विपक्षी दल लेबरका उम्मेदवार टीम मुर्रे लगायतका मैदानमा उत्रिएका थिए ।

लिबरलले दशकौंदेखि एकलौटी रुपमा जित हासिल गर्दै आएको उक्त क्षेत्रमा अप्रत्यासित रुपमा स्वतन्त्र उम्मेदवार फेल्प्सले जित हासिल गरेपछि सत्तारुढ लिबरल कोअलिसनले संसदमा रहेको ७५ सिटको बहुमत समेत गुमाउन पुगेको छ । जित हासिल गरेकी स्वतन्त्र उम्मेदवार फेल्प्सले सरकारलाई सहयोग गर्ने बताएको भएपनि राजनीतिक अन्यौल भने शुरु भएको छ । पछिल्लो केही समयदेखि पेचिलो बन्दै गएको अष्ट्रेलियाको राजनीतिमा शनिबार भएको उप निर्वाचनपछि अस्थिरता आउन सक्ने विष्लेषण गरिएको छ । वर्तमान सरकारलाई स्वतन्त्र सांसदहरुले पूर्ण सहयोग नगरेको खण्डमा आउँदो मे मा हुनुपर्ने निर्वाचन समय अगावै हुन सक्ने विष्लेषण समेत शुरु भएको छ ।

अष्ट्रेलियाको यो उप निर्वाचन दक्षिण एसियाका देशहरुमा देखिने घिनलाग्दो राजनीति र बदलाको भावनाले ग्रस्त भएको छनक दिएको विश्लेषकहरु बताउछन् । सरकार अल्पमतमा परेको भएपनि केही स्वतन्त्र सांसदहरु तथा उपसभामुखले सरकारलाई टिकाउने र समय अगावै निर्वाचन टार्ने संकेत दिइसकेकाले अहिलेलाई राजनीतिक अन्यौलता टर्न सक्ने विश्वास गरिएको छ ।

Comments

comments