काठमाडौं । पुराना गाडीले प्रदूषण बढाएको भन्दै सरकारले आगामी चैत १ देखि मुलुकभर २० वर्षभन्दा पुराना गाडी चलाउन नदिने भएको छ।

गत वर्षको फागुनमै पुराना गाडी हटाउने निर्णय भए पनि कार्यान्वयनमा आउन सकेको थिएन । काठमाडौंबाट विस्थापित भएका कयौं गाडी उपत्यकाबाहिर सञ्चालनमा छन् । यातायात व्यवस्था विभागले अब मुलुकभरिबाटै २० वर्ष पुराना गाडी हटाइने जनाएको छ ।

पहिलो चरणमा गाडी धनीलाई चेसिज, इन्जिन बुझाएर पुराना गाडी ‘पत्रु’ गर्न अनुरोध गरिसकिएको विभागले जनाएको छ । चैत १ देखि ट्राफिक प्रहरीसँग समन्वय गरेर पुराना गाडी नियन्त्रणमा लिने विभागको भनाई छ ।

यातायाता व्यवस्थ विभागले मुलुकभरका यातायात कार्यालयलाई पुराना गाडी नियन्त्रणमा लिन निर्देशन दिएकोछ । सामान्यतः गाडीको आयु २० वर्ष मानिने भएकाले विभागले सञ्चालन अनुमति पनि त्यति अवधिकै दिन्छ ।

बीस वर्ष नाघेका गाडी कति छन् भन्ने यकिन तथ्यांक विभागसँग पनि छैन । प्रदूषण बढाउने, खर्चिलो हुने, दुर्घटना बढाउने भएकाले पुराना गाडी हटाउनुको विकल्प नभएको विभागका एक अधिकारीले बताए ।

नेपाल यातायात व्यवसायी राष्ट्रिय महासंघले भने पुराना गाडी हटाउने निर्णय वैज्ञानिक नभएको बताएको छ ।

Comments

comments