एजेन्सी । अमेरिकी सञ्चारमाध्यममा अनुसार फ्लोरिडास्थित एउटा उच्च माध्यामिक विद्यालयमा भएको बन्दुक आक्रमणमा कम्तीमा १७ जना मारिएका छन्।

एकजना १९ वर्षीय पूर्वविद्यार्थीले सो आक्रमण गरेको ठानिएको छ। अधिकारीहरूले अन्य १४ जना विद्यार्थी घाइते भएको बताएका छन्।

किशोरावस्थाको उत्तरार्द्धमा रहेका सन्दिग्ध आक्रमणकारी निकोलस क्रुजलाई गिरफ्तार गरिएको छ। उनी मायामीभन्दा ७० किलोमिटर उत्तरमा पर्ने पार्कलेण्डमा रहेको मर्जोरी स्टोनमेन डग्लस हाइ स्कूलका पूर्वविद्यार्थी भएको विश्वास बताइएको छ ।

समाचारमा उल्लेखा भए अनुसार ती विद्यार्थीलाई विद्यालयबाट निष्कासन गरिएको उल्लेख छ । निकोलसले आगो लागेको खतरा जनाउने घण्टी थिचेर विद्यालयमा अस्तव्यस्ता सिर्जना गराएको र त्यसपछि गोली चलाउन थालेको सुरक्षा निकायहरूले सीबीएस न्यूजलाई जानकारी दिएका छन्।

गोली चल्न थालेपछि विद्यार्थीहरूले कक्षा कोठाभित्र लुक्न बाध्य भएका थिए भने प्रहरीहरू विद्यालय परिसरलाई सुरक्षित बनाउने कारबाही तत्कालै थालेका थिए।

अमेरिकी संघीय जाँच निकाय एफबीआइले स्थानीय सुरक्षा निकायलाई अनुसन्धानमा मद्दत गरिरहेको जनाएको छ।

Comments

comments