पोखरा । पोखरामा जारी १५ औं आहा रारा गोल्डकपको उपाधिका लागि शनिबार आयोजक सहारा क्लब र साबिक विजेता मनाङ मर्स्याङ्दी क्लबबिच प्रतिस्पर्धा हुँदैछ ।

उपाधिका लागि सहारा र मनाङ दोस्रो पटक प्रतिस्पर्धा गर्न लागेका हुन् । यो संस्करणसहित ९ पटक फाइनलमा पुगेको मनाङ्गले अहिलेसम्म चार पटक उपाधि जितेको छ । सहारा क्लब यो पटकसहित तीन पटक फाइलन पुगेको छ । सहाराले एक पटक उपाधी जितेको छ ।

सहारा पहिलो चरणमा सुदूरपश्चिम, क्वाटरफाइनलमा युनाइटेड सिक्किम भारत र सेमिफाइनलमा आर्मीलाई हराउँदै उपाधि नजिक पुगेको हो । मनाङ क्वाटरफाइनलमा धरान फुटबल क्लब र सेमिफाइनलमा संकटा क्लबलाई हराउँदै उपाधि होडमा आएको हो । फाइनल खेल पोखरा रंगशालामा शनिबार दिउँसो हुनेछ ।

प्रतियोगिताको विजेताले पाँच लाख एक हजार एक नगदसहित शिल्ड, मेडल र प्रमाणपत्र पुरस्कार प्राप्त गर्नेछ भने उपविजेताले दुई लाख ५१ हजार एक रुपैयाँ नगद पुरस्कार प्राप्त गर्नेछ ।

प्रतियोगिताको सर्वोकृष्ट खेलाडीलाई एउटा स्कुटर प्रदान गरिनेछ । त्यस्तै उत्कृष्ट गोलकिपर, डिफेन्स, मिडफिल्ड, स्ट्राईकर र प्रशिक्षकलाई जनही १५ हजार रुपैयाँ नगद प्रदान गरिने आयोजकले जनाएको छ । प्रतियोगिताको सर्वाधिक गोलकर्ताले २५ हजार रुपैयाँ प्राप्त गर्ने छन् ।

Comments

comments