काठमाडौं । राष्ट्रिय परिचयपत्र ब्यवस्थापन केन्द्रले परिचयपत्र सम्बन्धि काम सुरु गरेको छ ।

प्रतिस्पर्धाबाट परिचयपत्र बनाउने जिम्मा पाएको फ्रान्सको फफ्रान आइडेण्टीटी एण्ड सेक्युरिटी कम्पनीले परिचय पत्रको काम सुरु गरिसकेको व्यवस्थापन केन्द्रले जनाएको हो ।

निर्वाचन आयोगले संकलन गरेका विवरणलाई प्रयोग गर्दै पहिलो चरणमा सरकारले ६ महिनाभित्र एक लाख १० हजार नेपालीलाई राष्ट्रिय परिचयपत्र वितरण गर्ने छ । विश्वका सयभन्दा बढी देशमा राष्ट्रिय परिचयपत्र वितरण भइसकेका छन् । राष्ट्रिय परिचयपत्र प्राप्त नागरिकको सम्पूर्ण वैयक्तिक विवरण भण्डारण एक स्वचालित चिप्स मार्फत रहने व्यवस्था मिलाइएको छ । परिचयपत्र वितरणका लागि ६ महिनामा सात हजार कर्मचारी परिचालन गरिने राष्ट्रिय परिचयपत्र व्यवस्थापन केन्द्रका कार्यकारी निर्देशक दिनेश भट्टराईले जानकारी दिनुभयो ।

नेपालको संविधानको धारा ५१ च (७) मा नागरिकका सूचना र विवरण एकीकृत रुपमा व्यवस्थापन गर्न एकीकृत राष्ट्रिय परिचय व्यवस्थापन सूचना प्रणाली लागू गरिने भनिएको छ । राष्ट्रिय परिचयपत्र प्राप्त व्यक्ति सेवा प्रवाह गर्ने सरकारी निकाय लोकसेवा आयोग, राहदानी विभाग, जिल्लास्थित मालपोत यातायात व्यवस्था स्थानीय पञ्जीकरण कार्यालय तथा स्थानीय निकाय, बैंक, टेलिकम लगायत संस्थासँग आबद्ध हुन्छ ।

एसियाली विकास बैंकको सहयोगमा ५१ करोड ७१ लाख ४२ हजार ५१ रुपैया लागतमा राष्ट्रिय परिचयपत्र प्रणालीको केन्द्रीय प्रणाली र स्थानीय प्रणाली स्थापना भई परिचयपत्र वितरण गरिसकिने छ । राष्ट्रिय परिचयपत्रबाट नागरिकको शान्ति सुरक्षा र कानुन कार्यान्वयनमा सहजता, विकास निर्माण र योजना तर्जुमा, सेवा प्रवाहमा चुस्तता, प्रभावकारी र सुशासन कायम गर्न सहयोग पुग्ने विश्वास लिइएको छ ।

Comments

comments