काठमाडौं । चिनियाँ राष्ट्रपति सी जिनपिङको नेपाल भ्रमण तय भएसँगै भारतीय राष्ट्रपति प्रणव मुखर्जी पनि नेपाल आउँने खबर बाहिर आएको छ ।

सरकारले भारतीय राष्ट्रपति प्रणव मुखर्जीलाई पनि सन् २०१६ भित्रै भ्रमण गराउन पहल सुरु गरेको हो । सरकारले भारतीय राष्ट्रपतिको भ्रमणका लागि कूटनीतिक र राजनीतिक सम्पर्क लगातार अघि बढाएको छ ।

सरकारले चिनियाँ राष्ट्रपति सीलाई असोजको अन्त्यमा स्वागत गर्ने तयारी गरिरहेको छ । त्यसलगत्तै वा अघि हुने गरी भारतीय राष्ट्रपतिको नेपाल भ्रमण गराउने तयारी पनि थालिएको हो

प्रधानमन्त्री केपी ओलीले भारत भ्रमणका क्रममा राष्ट्रपति विद्यादेवी भण्डारीका तर्फबाट मुखर्जीलाई नेपाल भ्रमणको निम्तो दिएका थिए । नेपालको निमन्त्रणा प्रस्तावमा भारत सकारात्मक भए पनि मुखर्जीले कहिले भ्रमण गर्ने भन्ने यकिन भइसकेको छैन ।

भारतका कुनै पनि राष्ट्रपतिले १९ वर्षदेखि नेपाल भ्रमण गरेका छैनन् । नेपालका तर्फबाट लगातार भारतको भ्रमण हुने तर भारतको तर्फबाट विरलै हुने भन्दै नेपालले विभिन्न तहबाट भारतीय राष्ट्रपतिको नेपाल भ्रमणका लागि आग्रह गरिरहेको जानकारी परराष्ट्र सम्बद्ध अधिकारीले दिए।

परराष्ट्रमन्त्री थापाले पटकपटक चिनियाँ राष्ट्रपतिको भ्रमणको पनि पहल भइरहेको बताएका थिए । साउथ चाइना मर्निङ पोस्टले पनि चिनियाँ राष्ट्रपति सीको नेपाल भ्रमण हुने संकेत गरेको छ । नयाँ दिल्लीमा असोज २९ र ३० मा हुने व्रिक सम्मेलनमा भाग लिन जानुअघि वा भाग लिएर फर्कने क्रममा उनको नेपाल भ्रमण हुने सम्भावना रहेको जनाइएको छ ।

Comments

comments